Veer höbbe eine opreup gedaon om'ns te kieke of geer nog urges fotoos houwt ligge van de beginjaore van de vastelaovesoptochte in Aelse.
Lies van Thomasse haet gezeuk en vonj ein foto die gemaak is van de allerjètste optoch in Aelse.
In 1953 wie Toon Verboort prins van de Sajelaire waor is d'n optoch in Aelse neet doorgegeange. De raeje hievan waor de grwatte watersnwat in Zjèlèndj.
Daorum waor d'n jètste optoch in 1954.
Op de foto zeet geer eine fitserenner; dat waor de minsj van Lies, Thei van Thomassen.
De luuj in dae tied waore inventief; kiek mèr. Thei  haet ein autostuur baove op ziene fits gemaak.

Dae Thei waor eine hèlle; mit korte brook en korte moewe ging dae in d'n optoch mit.
Saame mit ziene vrundj Harie van Sjeng Hoube deege zie de toer nao. Op dees foto sjteit Harie saame mit ziene vrundj Thei.
Harie waor in dae tied al veuroetstreevend; hae haw al ein grwatte koplamp op 't stuur van ziene fits gemonteerd. Dae wis al, dat 't duuster zaw zeen es hae heives zaw gaon.
Dat die tsjwè zich verammuseerd zulle höbbe in d'n optoch, dat kenne veer uch verzeekere.

Lies haet auch nog ein foto gevonje oet 1958. Op dees foto gemaak in de Daalstraot in Catsop  steit ze saame mit Maj van de Bartel.
Dat waore hartsvriendinne; die zeen in de beginjaore menige kjèr mit d'n optoch mitgegange.
Veur dae tied hawwe zie ein sjwan pèkske aan, en dan dae rok: zelf gemaak. Dao haet menig uurke njèj- en knipwerk ingezaete.
Lies, naames de redaksie van de Sajelair bedank en luuj laot dit ein veurbeeld zeen om os de kommende jaore  nog te veurzeen van eine grwatte houp fotoos oet dae gooje auwe tied.

Van Harie van de Veldwachter kreeg veer dees fotoos. 't Zeen historiese foto's van ein van de jètste optochte dae door oos Aelsere Sajelairedörp leep.
Geer zeet eine zigeunergroep en ein boerebroelof oet de 18e eew, oetgebeeld door de buurt Staasjewaeg, dat is nog op 't bördje te laeze.
Es d'r nog mjè luuj zeen mit fotoos van de vastelaovend van vreuger: de redaksie plaats ze gaer.

Oet de auw dwas